Tió:konte tiawe'towá:nen tehatiténies ne kí:ken ratira'sehtsheráhrha tánon ratirennáhrha. Eh tkanonhkwà:tsherare tánon eh tkarì:ware. Nè:'e enkaierón:nitste tsi ó:nen'k tsi eniakotáshi tsi ní:tsi eniontonhwentsahtén:ti. Iah káneka teká:ien ne ísi' nón:we naieierón:nitste thí:ken, tho'k nón:we kara'sehtsherarà:ke.

Skén:nen entsakaón:ni nón:kwe kí:ken kara'sehtsherarónnion. Tánon entsako'nikonhrahní:rate. Onhwentsakwé:kon én:wéhte. Tánon tekahnerenhátie nakwé:kon.

Ohnà:ken tsi iontaweia'táhkhwa nikahá:wi kwah wa'kanákeren'ne ne aiontéweienste kara'sehtsherarà:ke. Ne ne tsi niká:ien tahatiiá:ken'ne eh nón:we. Ronaterièn:tarahkwe tsi ó:nen'k tsi tsi nihatira'sehtsheráhrha nón:we entkaiá:ken'ne ne ionkhi'nisténha akotónhnhets. Háti' wáhi tsi wahonwatirihwashéhten tánon wahonwati'nikonhráta tsi wahétken eh nahò:ten. Kwah wahati'shén:ni thí:ken nonkwe'shòn:'a. Nè:'e raonawenhkénha ne ahshakotiieronnítsten nón:kwe tsi nahatiia'to'tèn:ne.Tsi nahatiia'to'tèn:ne tsi nithoné:non tánon tsi nahò:ten thatíhnhes. Kwah tokèn:'en ka'shátste eh nahò:ten.

Shé:kon nòn:wa ka'shátste tsi ní:tsi ratiieronnítstha tsi nahatiia'tò:ten ne onkwehón:we. Ionkhi'nistenhnéha tánon tsi nihotirihò:ten nón:we thatitshénries. Tánon tsi kara'sehtsherarà:ke iehotì:re tsi nihatiweién:te. Tió:konte shitewa'nikonhraweiénhen ì:'i tionkwehón:we. Eh ní:tsi wetewatohnhahní:rate. Iah tha'tewattíhen kara'sehtsherarà:ke.