Ó:ia ní:ioht ne onhwentsà:ke. Tsi nihsia'tò:ten ió:wis. Ensaia'tató:kenste. Entsisa'nikonhraké tsko. Enionkwa:ion akwé:kon tsi nahò:ten ón:kwe ronné:saks tsi niionhwéntses. Ashá:takon wa'késhon. Wa'khé:ken ón:kwe owisó:kon ia'eià:ten'ne. Á:ienhre'k tsi tensewakháshi tsi na'tesewà:neren ne iesaièn:'a tóka' enhserihwéntho tsi nahò:ten tesenì:neren.

Ionhwentsanó:ron wáhi ne kèn:tho Koráhne nón:we. Tió:konte shiwakhretsá:rons tsi khé:kens é:so iá:kon ken' nitiakoién:sa ierihwáia'ks. Tsi niká:ien teierihwásnie ne tsi nén:we aká:take nonhwéntsa tánon tsi niionhwentsò:tens. Á:ienhre tsi nek onkwehonwehnéha khok í:ken ne ken' nahò:ten, Néktsi iah nek té:ken í:kehre. Onkwehnéha ne ken' nahò:ten. Kwah nè:'e tewakerihowanà:se ne kí:ken ón:kwe taonsahontékha skátne ne kí:ken ró:ti ne kèn:tho tewanákere kwah nè:'e karátie ne onkwehonwehnéha Ì:'i ionkhi'nisténha, í:se sa'nisténha, ì:'i ake'nisténha. Tho ní:tsi tiónhnhe, tsi ní:tsi tewatón:rie. Iah thikaweraténion tetewatón:rie, iah thikahnekaténion tetewahnekihrha. Ó:nen'k tsi skátne kèn:tho aietewanákerake. Iethiien'okòn:'a enshonawénhake.

Shahón:newe ne Ratihnarà:ken, tahatíhawe tsi ní:tsi aontaiakotonhnhetsheró:ka'te. Tsi nek ióntstha tóka'ni iontenhní:nons nikontiia'to'ténhne. Nè:'e iah tha'tehonatonhwentsoníhahkwe ne aietewarihwáia'ke tsi a'é:ren ratihawíhtha akwé:kon. Tho ní:tsi wahshakoti'shén:ni nonkwehón:we, tsi wahati'shén:ni ne raotiní:io. Onhwentsà:ke nitiawé:non ne onkwehtahkwáhtshera. Ó:nen'k tsi wáhi wahati'shén:ni ne ki' naón:ton tósha raotihén:ton aietewè:sheke. Nó:nen iah tetehsehtáhkhwa tsi iotonhnhétsherat ne ohné:kanos, tóka'ni orón:ta ó:ni, enwá:ton wáhi áhsia'ke. Iosherá:ke tsi náhe, shahatiianerensherón:ni skátne Onkwehón:we ne Ratihnarà:ken, é:so wahshakotiianerénsheron ne ronnó'kwats. Iah tehoti'nikonhraién:ta'skwe tsi nahò:ten kahiá:tonhkwe kahiatonsherà:ke ne Onkwehón:we.

É:so waterihwatkèn:se ká:ien wathró:ri tsi uranium nitewéhtha ne otsina'kwakón:ha tánon onekwensha'kéha takwa'áshon tánon ne aiakonó:ron naiakowiraién:ta'ne. Tsi niio'táksen. Wahetkénhtha ne onhwéntsa aorihwà:ke. Eh karátie Quebec Plan Nord ne uranium.