Shé:kon sewakwé:kon, Alex McComber ióntiats. Kanien'kehá:ka na'tia'tò:ten tánon Kahnawà:ke nitewaké:non.

Wathretsá:ron tsi niionkwata'karí:te watió'te. Ka'nón:no Brooklyn nón:we wa'katehià:ron, tsi niiosherá:ke ó:nen shikì:teron kèn:'en é:so wa'keweientéhta'ne ónhkha ne Kanien'kehá:ka nè:'e tsi iah ónhkha nè:'e teionkerihonnién:ni shiwakatehiahróntie ne thí:ken tewatatenorónhkwen, tekaié:nen, karihwakweniénston. Sénha watia'tákstehkwe, ákta ne tékeni tewen'niáwe niwatia'tákstehkwe. Shé:kon nòn:wa katekhón:nis tsi nonkwá:ti ne kakhwakarèn:re sewatié:rens.

Sok thò:ne onktó:ken'se tsi í:wehre taonkenekwenshatsikhè:tara'ne ià:ia'k niiosherá:ke tsi náhe. Shonsaióhrhen'ne ohrhon'kehnéhkha sha'tekatska'hòn:ne wa'tewákhkwa'te tsi nè:'e í:wehre aontié:na. Kheh í:kete tewakerón:wi tsi nakátiere tánon tsi nahò:ten kékhe, thò:ne ontia'tié:nenhte.

Kwah í:wehre aionkwa'nikonhraién:ta'ne tsi ní:tsi wa'onkwaié:na ne kí:ken wa'onkhiionhwentsáhkhwa, wa'tionkhi'nikonhraté:ni, wa'onkhiia'wéntho ne kí:ken ratihnarà:ken tánon ne kèn:tho Koráhne ne ki' kentskwáksen tsi eh nón:we tontón:ti ne teionekwenshatsikhè:tare tánon takwa'áshon, ne kanonhwarahtónhtshera tánon ne watatia'tatiesáhton. Íhsehre ken ahsenekwenshakwatá:ko? Ó:nen'k tsi tentsitewatáthawe. Ó:nen'k tsi entsitewatatewenní:ioste. Ó:nen'k tsi sha'tentsitewatatenó:ronhkwe.

Ionkwatahkatstá:ton. Aweronhátien wáhi tsi wa'onkwaia'tié:nenhte ne kí:ken wísk tewen'niáwe niiosherá:ke, ó:nen nòn:wa tsitewahní:rats ne onkwatónhnhets tánon tsi niionkwata'karí:te. É:so teka'nikónhrhare tsi nonkwá:ti tsi niionkwata'karí:te tánon tsi niionkwa'nikonhrò:tens, kwah iah tetsitewatorià:nerons.