Teionkwè:take nitewaké:non néne iah nonwèn:ton ónhte thakheshennaienteríhake. Alberta nitewaké:non sok Ontario nohnà:ken.Tekaiáshonte kakarewáhton nitewaké:non, sá'ne tsi iah tió:konte tehsatkáhthos tsi wakatewì:rare. Eh nitewaké:non néne tsi niká:ien thio'kéha, teká:tens tánon kà:sere róntstha tsi ratiweraksà:tha. Tsi niká:ien thihonnéhtha taionkté:ni tsi tkaterihwaiénstha. Tsi niká:ien ratíshere tsi nahò:ten ronathón:te's tánon iah tsi nahò:ten rontkáhthos. Tsi niká:ien rón:nehre sénha ratiweién:te néne Shonkwaia'tíson ní:ioht. Tsi na'karístati néne iah tetkaié:ri nitewaké:non tánon ó:nen'k tsi a'é:ren á:kehte.
Sha'oié:ra í:ken. Nè:'e enhshenó:ronhkwe tsi niká:ien sé:ri iakonorónhkhwa. Watkon'seranó:ron thí:ken tsi na'tehiátere nón:kwe. Iorihowá:nen ó:ni nakwé:kon eh aiakoién:take. Tánon thí:ken onkwe'tanó:ron aiesenè:sheke ó:ni. Iorihowá:nen ne katokénston tsi ní:tsi ahshthá:rahkwe. Iah akwé:kon té:ienhre iakonón:wat aiontatenà:tonhkwe. Wa'tiakwatátken tsi niká:ien nek enionnónhton tsi nahò:ten eniontatenà:tonhkwe. Ótia'ke nek iakaon'wéskwani á:iontste ne wakattakwaríshion, wakenón:wat.
Robbie Madsen ióntiats. Kaié:ri niwáshen énska nitewátien. Ratihrhakón:ha Kanakeráshera nitewaké:non. Iakonón:wat ionkena'tónhkhwa. Nè:'e iakwén:ton tsi tetsá:ron rosken'rhakéhte tánon tsakothonwí:sen raonatónhnhets ieia'tontáhkwen ne kí:ken ón:kwe. Enhonwatikwénienste shens tánon ratishennowá:nen nonkwehonwè:ke ne ronónha. Ohén:ton shahón:newe, onónhkwa, kanén:nawen tánon ate'nikòn:ra ratihá:wahkwe. kaniá:kon rati'nikòn:rarahkwe, shakotirihonnienníhahkwe, thikawenní:io nahò:ten. Kwah ratiweientehtòn:ne nahshakotiia'takéhnha nón:kwe tánon ne ahshakoti'nikonhrasherón:ni. né:tsi rotikweniónhne rón:kwe nonkwá:ti tánon iakón:kwe nonkwá:ti ahontkáhtho. Tsi nonkwá:ti tsi niionkwarihò:ten, atshinatónhtshera tánon kaia'tisa'áhtshera rontkáhthoskwe ne ronnonkwehón:we tsi iokwenhrá:ron ní:ioht tsi niiakónhnhes ónhkha'k.Tánion tió:konte teiottenionhátie ó:ni. Sha'tetewatatenorónhkhwahkwe tsi nonkwá:ti tsi ní:tsi iakoia'tíson tánon tsi ní:tsi iakotshí:naton. Wa'tkenhnà:rihte tsi nahò:ten ronateríhonte ne rotinón:wat ne kí:ken shahón:newe. Wa'tehshakotikháshi ronónha tánon onkwehonwe'shòn:'a. Iosnó:re wa'thontonhnhaté:ni ne rotinón:wat sha'onkhiiataweià:ten.
Háti' tsi nienká:ienhte enhsatkátho kí:ken iakonón:wat tánon teiontia'taténies ronwatitshà:nis. Kwah iah í:se tesén:ton. Ronónha rotíshon kí:ken nahò:ten ne kí:ken wa'onkhiiataweià:ten.Tánon sewatié:rens wentó:re. Tósha nonwèn:ton sátkahwh ónhkha ní:se.
